Мақолалар

Декан Маман Сарыбаев ҳаққындағы видео бойынша: “Желөкпелик емеспе бул ямаса апаңның май дегени торақ шықпасын!”

Көпшиликке белгили интернет тармақлары арқалы Әжинияз атындағы Нөкис мәмлекетлик педагогикалық институтының Тарийх факультети деканы Маман Сарыбаев Қытайбековичти ишки ислер органлары хызметкерлери тәрепинен қуўып услап оны видео көриниске алған ҳәрекети тарқалды.
Буннан тысқары интернет тармақта М.Сарыбаев институтта «династия» қурған егер Сиз бул ҳаққында мағлыўматқа ийе болсаңыз хабар бериң сыр тутылады деген мәниде пост қалдырылған.
Енди бул ҳәрекеттиң қәншелли нызамға туўры келетуғынлығына баҳа берсек.

Бириншиден, Қарақалпақстан ҳәм Өзбекстан Республикасы Конституциясының 26-статьясында, буннан тысқары Өзбекстан Республикасы Жынаят Процессуал Кодексиниң 23-статьясында гуманланыўшы, айыпланыўшы, судланыўшының жынаят ислегенлиги нызамда нәзерде тутылған тәртипте ыспатланбағанша ямаса суд ҳүкими менен айыбы тастыйықланбағанша айыпсыз есапланады делинген. Бул ҳәрекет «Судлар ҳаққында»ғы нызамының 10-статьясындада сәўлеленген.
Екиншиден, Қарақалпақстан ҳәм Өзбекстан Республикалары «Ғалаба-хабар қураллары ҳаққында»ғы нызамының 6-статьясында, бундай мағлыўматты прокурор, тергеўши яки сорастырыўшының жазба руқсатысыз жәриялаўға ҳақылы емес делинген.
Үшиншиден, Пуқаралардың мәлимлеме алыў кепилликлери ҳәм принциплери ҳаққында»ғы нызамында мәлимлеме (мағлыўмат) алыў,тарқатыў деген атамаларға түсиник берилген, егер кимде ким шахс үстинен нызамға қайшы түрде мағлыўмат тарқатса нызам талапларына муўапық жазаға тартылатуғынлығы көрсетилген.
Демек, бул ўақыя бойынша М.Сарыбаевты жынаятшы етип халыққа көрсетиў нызам талапларына қайшы келеди, себеби ҳеш ким кепиллик бере алмайды, себеби тергеў, суд жуўмағына көре М.Сарыбаев айыпсыз деп табылыўы мүмкин, мәселен оның автокөлигине биреў бойын атқан, көпирден үстине түсип кеткен яки болмаса рульде басқа шахс болған болыўы мүмкин.
Ал, енди оны М.Сарыбаев институтта «династия» қурған егер Сиз бул ҳаққында мағлыўматқа ийе болсаңыз хабар бериң, хабарыңыз сыр тутылады деген мәниде пост қалдырылған. Бул жерде Династия сөзине кәсип пенен байланыслы түсиник берсек, мысал ушын шахстың шежире бойынша тухымынан бир емес үш мәрте ҳәм одан көп шахс сол лаўазымда ислесе оны династия десе болады, демек М.Сарыбаев бойынша бундай мағлыўмат тарқатыў нызамға қайшы келеди.

   Бул видео көринис ишки ислер органлары тәрепинен тарқалған көринеди демек бул ҳәкимият ўәкиллериниң ҳәрекетине тийисли органлар баҳа бериўи лазым.

Ел хызметинде газетасы бас редакторы Д.М.Тәжимуратов

You may also like

Comments are closed.