Янгиликлар

Журналистлик шолыў: Тахтакөпир, Қараөзек, Мойнақ районларында турақлы жасаўшы ҳәм тест сынақларынан “жығылған” абитуриент қандай тәртипте оқыўға қабыл етилиўи мүмкин?

Өзбекстан Республикасы Президенти Ш.М.Мирзиёевтиң 2020 жылғы 2-октябрь күни Қарақалпақстан Республикасына хызмет сапары даўамында ҳәм Қарақалпақстан Республикасы Жоқары Кеңесиниң гезектен тыс сегизинши сессиясында берилген тапсырмалар ҳәм кеңейтирилген тәризде өткерилген 73-санлы Мәжлис баянында экологиялық жағдайы қурамалы болған регионларда инвестиция дәстүрлери шеңберинде шөлкемлестирилип атырылған жумыс орынларын есапқа алған ҳалда, 2020-2021 оқыў жылынан жоқары оқыў орынларының тест сынаўларында топлаў мүмкин болған максимал балдың 30 процентинен жоқары балл топлаған Мойнақ, Тахтакөпир ҳәм Қараөзек районларында турақлы жасаўшы абитуриентлерге Қарақалпақстан Республикасындағы медицина тараўынан тысқары қәнигеликлер бойынша жоқары оқыў орынларына квотадан тысқары тәлим қәрежетлерин толық қаплайтуғын муғдардағы төлемли-шәртнама тийкарында, кейинги ўақытлары сол регионларда 5-жыл ислеп бериў шәрти менен оқыўға қабыллаў бойынша илажлар көриў белгиленген (Бул ўазыйпалар тийисли мәмлекетлик органлар тәрепинен орнатылған тәртипте басшылыққа алынады ҳәм әмелге асырылады).
Баянның усы бәнти менен танысыў барысында төмендегилерге итибар қаратылыў мақсетке муўапық болады, деп есаплаймыз:
1) инвестиция дәстүрлери шеңберинде шөлкемлестирилип атырылған жумыс орынларынан келип шығып (Мойнақ, Тахтакөпир ҳәм Қараөзек районлары ҳәкимиятының усынысы тийкарында, яғный районды раўажландырыўда қайсы тараў ўәкилликлерине талап болыўына қарап);
2) тәлим қәрежетлерин толық қаплайтуғын муғдардағы төлемли-шәртнама тийкарында (Контракт суммасының муғдары қанша болыўы ҳәм қандай әмелге асырылыўы ҳаққында мағлыўмат белгисиз. Мағлыўмат ушын, бул бойынша еле Министрлер Кеңеси яки ҳеш қайсы мәмлекетлик органның қарары яки буйрығы Масс Медиада жарық көрмеди);
3) Кейинги ўақытлары сол регионларда 5 жыл ислеп бериў шәрти менен оқыўға қабыллаў белгиленген (Демек, оқыўды питкерип усы районның раўажланыўы жолында жумыс ислеўи керек).
Ҳәр қандай жағдайда да соны есапқа алыў керек, бириншиден
Мәмлекетлик тест орайы тәрепинен тест сынаўларында қатнасып, тестте топлаў мүмкин болған максимал баллдың 30 процентинен жоқары болған абитуриентлер ҳаққында мағлыўматлар базасы қәлиплестириледи, екиншиден
Қарақалпақстан Республикасы Министрлер Кеңеси, Мойнақ, Тахтакөпир ҳәм Қараөзек районларының ҳәкимиятлары тәрепинен районның қайсы тараўды раўажландырыў кереклиги ҳаққындағы усынысы есапқа алыныўы тийис. Соннан кейин ғана Мәмлекетлик комиссия тәрепинен бул тастыйқланады.
Еслетип өтемиз ҳәр қайсы жоқары оқыў орнына абитуриентти студентликке усыныс етиў (тест нәтийжелери, нызамшылықта көрсетилген жеңилликлер тийкарында ҳ.т.б.) тек ғана Мәмлекетлик комиссия тәрепинен әмелге асырылады.

You may also like

Comments are closed.