Янгиликлар

Нөкис қаласында «Ҳаяллар» ҳәм «Жаслар» дәптерлерин қәлиплестириў бойынша жумыслар басланды


Нөкис қаласында «Ҳаяллар» ҳәм «Жаслар» дәптерлерин қәлиплестириў бойынша жумыслар басланды

Халықтың басым көпшилигин ҳаял-қызлар ҳәм жаслар курайды. Жәмийетимизде бар социаллық машқалаларда олар менен байланыслы. Соның ушын соңғы жылларда усы жөнелис бойынша жумыслар мәмлекетлик сиясат дәрежесинде алып барылмақта.

Бугинги күнде ҳәр бир мәҳәлле, район, қала ҳәм ўәлаят кесиминде «Жаслар дәптери» ҳәм «Ҳаяллар дәптери»н қәлиплестириў жумыслары алып барылмақта. Бунда Қарақалпақстан Республикасы бойынша Нөкис қаласы ҳәм Беруний районы «Ҳаяллар» ҳәм «Жаслар» дәптерлерин қәлиплестириўде үлгили деп белгилеп берилген. Усы жумысларды нәтийжели шөлкемлестириў мақсетинде, Нөкис қаласы ҳәкимлигинде жыйналыс болып өтти. Онда Кәсиплик аўқамлары федерациясы Қарақалпақстан Республикасы бирлеспеси баслығы У.Жалменов, Қарақалпақстан Республикасы Мәҳәлле ҳәм шаңарақты қоллап-қуўатлаў министриниң биринши орынбасары М.Ахмедова, Нөкис каласы ҳәкиминиң орынбасары Е.Алланов, Нөкис қаласы Мәҳәлле ҳәм шаңарақты қоллап-қуўатлаў бөлими баслығының биринши орынбасары Г.Абибуллаевалар тәрепинен исши топар ағзаларына түсиндириў жумыслары алып барылды.

Соның менен бир қатарда, жыйналыс даўамында «Ҳаяллар» ҳәм «Жаслар» дәптерлерин қәлиплестириў ушын ислеп шығылған анкеталарды толтырыў бойынша түсиниклери берилди. Исши топар ағзалары тәрепинен үйме-үй журилип толтырылған анкеталар аймақтағы жаслар ҳәм ҳаял қызлар ҳаққындағы мағлыўматлар базасын қәлиплестириўге хызмет қылады.        

Дерек: Нөкис қаласы ҳәкимлиги мәлимлеме хызмети

You may also like

Comments are closed.