Янгиликлар

«Тақыятас районындағы 11-санлы мектеп қысқа “таяр” ма?» Рәсмийлер мүнәсибет билдирди

Интернет тармақларыныӊ Kar24.uz сайтында жарияланған «Тақыятас районындағы 11-санлы мектеп қысқа “таяр” ма?» атамасында жарияланған видео көринис бойынша Тақыятас районы ҳәкимлиги тәрепинен үйрениў жумыслары алып барылды.
Тақыятас районында гүз-қыс жылытыў мәўсими басланар алдында район ҳәкимлигинде тийисли мәкеме шөлкемлери қурамында штаб шөлкемлестирилип исши-топар дүзилген ҳәмде усы исши топар ағзалары районда жайласқан ҳәр бир социал объектлер, бала-бақша, мектеплер, тәлим орайлары ҳәм көп қабатлы үйлер тийисли тәртипте үйренилип шығылған ҳәмде кемшиликлерди сапластырыў бойынша қатаӊ түрде жумыс алып барылған. Жылытыў мәўсиминде тәбийий газ жетип бармайтуғын аймақлардағы мектеплер көмир ҳәм отын менен толық тәмийинленген.
Жоқарыда айтылған видео көринистеги 11-санлы улыўма билим бериў мектеби районныӊ газ жетип бармаған аймағында жайласқан болып, бул мектеп ҳәзирде көмир ҳәм отын менен жылытылады. Мектеп оқыўшыларыныӊ билим алыўда тийисли шарайыт жаратыў мақсетинде 24-саат бойлап от жағылып мектеп ханаларын жыллы тутыў жолға қойылған. Деген менен мектеп қазаншы хызметкери (котелшик) көмир жағыўдағы шалалығы себебинен мектеп имаратыныӊ бир жағы дурыслы қызбай қалғанлығы себепли усы жағдай келип шыққан. Мектеп директоры О.Байлиев жағдайды сапластырып оқыў процесин тоқтатпай электр печка қойып, сол арада жылытыў тизиминдеги насазлық сапластырылған. Ҳәзирде мектеп ханалары жыллы ҳәм мектеп қазаншы хызметкерлери тийисли тәртипте өз жумысларын алып бармақта.

Тақыятас районы ҳәкимлигиниӊ Мәлимлеме хызмети

You may also like

Comments are closed.