2021-жылдан баслап жоқары оқыў орынларына кириўде ең жоқары балл топлаған жаслар ушын Президент грантлары шөлкемлестириледи

Алдын хабар бергенимиздей, бүгин Ташкент қаласындағы «Ҳумо Арена»да Өзбекстан жаслары форумы болып өтпекте.

Форумда Өзбекстан Республикасының Президенти Ш.Мирзиёев қатнаспақта.

Форумда Президент төмендегилерди айтып өтти:

• Жаслар тәрепинен алға сүрилип атырған жаңа идеяларды мәмлекет тәрепинен қоллап-қуўатлаў ушын 100 миллион доллар қаржыға ийе өз алдына фонд шөлкемлестириледи;
• Келеси жылы микрокредитлер ушын 45 миллион доллар ажыратылады;
• Исбилерменликти енди баслап атырған жаслар ушын «Жаслық» киши санаат зоналары шөлкемлестириледи;
• Келеси жылы 500 мың жас әўлад ўәкиллери ушын жаңа жумыс орынлары жаратылады;
• Жаслар машқалалары, әсиресе, басшылар менен тиккелей пикирлесиў орнатылатуғын «Жаслар мүрәжаты» платформасы жаратылады;
• 300 мың жас «IT» орайларында бийпул оқытылады;
• 2021-жылдан баслап жоқары оқыў орынларына кириўде ең жоқары балл топлаған жаслар ушын Президент грантлары шөлкемлестириледи;
• Магистратура ҳәм докторантура ушын берилетуғын Президент стипендиялары муғдары еки есеге көбейтиледи;
• Жаңа Ренессанстың символы сыпатында Ташкентте заманагөй китапхана қурылады;
• 2025-жылы Ташкентте Азия ойынлары өткериледи. Оған шекем аймақларда ҳәкимлер кубогы жарыслары өткериледи.

Өзбекстан жаслары форумы даўам етпекте.

Ислам Матеков таярлады.