Мақолалар

“Мағлыўмат бермейтуғын болдық” яки Шымбай ҳәкиминиң жаңа хызмет автомашинасы мәмлекетлик сыр ма яки…?

Социаллық тармақларда трендге айланған Шымбай районы ҳәкими лаўазымына тайынланған Айбек Тажетдинов хызметте пайдаланыў ушын EQUINOX автомобилин сатып алмақта деген хабарлар тарқалған еди. 349 млн. сумға сатып алыў бойынша шәртнамаға 21-декабрь күни қол қойылған. Оған муўапық 10 күн ишинде автомашина ийесине жеткерип бериледи. 7-ноябрь күни ҳәким лаўазымына тайынланған А. Тажетдинов не себеп автомашина сатып алыў шәртнамасын дүзгенлиги бизге елеге шекем нәмәлим. Бирақ, төмендеги сораўларға жуўаплар елеге шекем берилмеди:

Бириншиден, автомашина сатып алыў режеси районның жыллық бюджет бөлистирилиўи режесине киргизилгенбеди?
Екиншиден, не ушын бул саўда жыл соңында әмелге асырылды? Буның жаңа ҳәким келиўи менен байланысы бар ма?
Үшиншиден, автомашина сатып алыў ушын төленген пул қайсы есап бетинен қапланады? Бюджет пе яки бюджеттен тысқары қаржылардан ба?
Төртиншиден, алдыңғы хызмет автомашинасы қаяқта?
Бесиншиден, пандемиядан соңғы район бюджетине бул сатып алыў шәртнамасы өзиниң кери тәсирин тийгизбейди ме?

Шымбай районы ҳәкимияты Мәлимлеме хызмети қәнигеси менен телефон арқалы бул сораўларға рәсмий түрде мағлыўмат алыў ушын байланыстық. Деген менен, “пресса” Kar24.uz сайтына “мағлыўмат бермейтуғын болдық” деген шешимге келгенлигин жазып жиберди.
Хош, не ушын мағлыўмат берилмейди? Бул мәмлекетлик сыр ма яки…?
Буны еки мәнисте түсинсек болады: бириншиси, журналистлердиң гәпи гәп емес, екиншиси бул жерде бир гәп бар-аў…

Егер бул ойлар надурыс болса, тез арада рәсмий түрде себеплери фактлер арқалы көрсетиледи, түсинтириледи деп ойлаймыз.

You may also like

Comments are closed.