Янгиликлар

“Лидерлер мектеби” жойбары тийкарында ушырасыў өткерилди

Өзбекстан “Миллий тикланиш” демократиялық партиясы ис режесинде жасларымыздың жетекшилик қәбилетлерин жүзеге шығарыў, олардың сиясий, хуқуқый билимлерин беккемлеў, соның менен бирге, партияның кадрлар ҳәм депутатлыққа талабанлар базасын жаслар есабынан қәлиплестириў мақсетинде “Лидерлер мектеби” жойбары тийкарында ҳәр тәреплеме үлги алса арзыйтуғын, шаңарақта ҳәм жәмийетте мол тәжрийбеге ийе, мәмлекетимиздиң раўажланыўына өзиниң салмақлы үлесин қосып киятырған, пидайы кәсип ийелерин жаслар ҳәм партия белсендилери менен ушырасыў, сәўбетлесиў өткерилиў белгиленген.
Өзбекстан “Миллий тикланиш” демократиялық партиясы Нөкис қалалық Кеңеси тәрепинен “Лидерлер мектеби” жойбары тийкарында партия белсендилери ҳәм жасларды «Өзбекстан Қаҳарманы» ел сүйген, халық ардақлаған балалар шыпакери, акушер-гинеколог, искер ҳаял, меҳрибан ана, бахытлы шаңарақ бийкеси Онесия Сайтова менен ушырасыў кешеси өткерилди.
Бизиң әжайып халқымыз өзиниң жақсы пәзийлетлери, инсанийлық хызметлери, дөретиўшилик ислери, кәсипке пидайылылығы, мийримли, әлпайымлылығы менен дүньяға белгили инсанларды жетистирген.
Мине усындай бәрше жақсы пәзийлетлерди өзинде жәмлеген «Өзбекстан Қаҳарманы» ел сүйген, халық ардақлаған балалар шыпакери, акушер-гинеколог, искер ҳаял, меҳрибан ана, бахытлы шаңарақ бийкеси Онесия Сайтова өз өмири даўамында шыпакерлик «АНТ»ына садық болып, ҳәр қандай қыйын шараяттада халқымыздың нәрестелерин дүньяға келтирип, ана ҳәм бала өмирин сақлап қалыўда өзиниң салмақлы үлесин қосып, нәрестелерге өмир, аналарға қуўаныш бағышлап, халықтың алғысына бөленген «ҚАҲАРМАН ШЫПАКЕР».

ОНЕСИЯ САЙТОВА 1949-жылы Шымбай қаласында туўылды.
1972-жылы Андижан мәмлекетлик медицина институтын питкерген.
Институтты питкерип келгеннен соң, мийнет жолын Шоманай районындағы бирлескен емлеўханада акушер-гинеколог шыпакер болып ислеўден баслады.
Буннан соң Нөкис қалалық хаяллар мәсләхәтханасында участка шыпакери, қалалық туўыў үйинде шыпакер, акушер-гинеколог, Республикалық туўыў үйинде шыпакер, акушер-гинеколог лаўазымларында ислеген.
1989-жылы кәсибиндеги жемисли мийнетиниң нәтийжесинде «Жоқары дәрежели шыпакер акушер-гинеколог» атағын алыўға миясар болды.
Мийнеткешлик ҳәм жуўапкершиликти сезиниў ғана жақсы нәтийжелерге, табысларға жеткереди. Усындай жемисли мийнетлери хәм өз кәсибине садықлығы себепли, ҳүкиметимиз тәрепинен 1997 жылы Онесия Сайтоваға «Өзбекстан қаҳарманы» атағы берилди. Ол республикамыздағы ҳаял-қызлардан биринши болып, усы ҳүрметли атаққа миясар болған инсан.
Онесия Сайтова үлгили шаңарақтың уйытқысы, тәрбиялаған перзентлери жоқары билимли, халық хожалығының хәр қыйлы тараўларында жемисли мийнет етип атыр.
Ушырасыў даўамында бәрше қатнасыўшылар өзлери қызықтырған сораўларына жуўаплар алып, қаҳарман шыпакердиң өмир жолы, кәсиплик шеберлиги, мийнет тәжрийбеси менен жақыннан танысты.

You may also like

Comments are closed.