Мақолалар

Рәсмий: “Сокращение” болған МИБ қәнигеси ис-ҳақылары неге төлеп берилмеди?


Усы жылдың 21-январь күни «Ел хызметинде» телеграмм каналында «Ис ҳақылары қашан төлеп бериледи» атлы ҳәм усы бойынша газета бас редакторы Д.Тажимуратовтың пикирлери билдирилген видеолары жайластырылды.
Бул видеода, усы жылдың 19-январь күни «Нукус онлайн» youtube каналы блогери ҳәм алдын системада ислеген бир қатар пуқаралардың Бюроның ҚР басқармасы имәратына келип, Президентимиздиң 18.06.2020-жылғы ПФ-6010-санлы Пәрманына муўапық, өз лаўазымлары қысқарыўы мүнәсибети менен, оларға компенсация төлемлериниң төленбей атырғанлығы бойынша мүрәжаты сәўлеленген.
Жоқарыда атап өтилген Пәрманға муўапық, 01.08.2020-жылдан Бюро органларының электр энергиясы ҳәм тәбийғый газ тараўындағы ўәкилликлери тамамланыўы мүнәсибети менен, «Аймақлық электр тәрмақлары» ҳәм «Ҳудудгазтаъминот» акционерлик жәмийетлерине қосымша жумысқа алынатуғын хызметкерлер, биринши нәўбетте Бюро органларында хызмет өтеген ҳәм қысқарыўға түскен хызметкерлер есабынан қабылланыўы белгиленген.
Усы мүнәсибет пенен, дәслеп, 2020-жылдың 19-июнь күни тийисли хызметкерлерге рәсмий түрде ескертиўлер берилген ҳәм Пәрманға муўапық оларды жумыс пенен тәмийнлеў иләжлары көрилип, ҳәзирги күнге дейин, жәми 160 хызметкердиң
(93-«Ҳудудгазтаъминот» АЖ; 30-«Аймақлық электр тәрмақлары» АЖ ҳәм 37 хызметкер – басқа мәкеме (шөлкем) лерге) жумысқа орналасыўы тәмийнленди.
Соннан кейин, арадан 5 ай өтип, яғный 24.11.2020-жылда «Суд ҳүжжетлери ҳәм басқа органлар ҳүжжетлерин орынлаў системасын жәнеде жетилистириў иләж-шаралары ҳаққында» ғы ПФ-6118-санлы Пәрманы имзәланып, Бюро органларының алдағы ўазыйпалары ҳәм шекленген штат кестелери белгиленди.
Буннан тысқары, Пәрман менен, Мәжбүрий орынлаў бюросын раўажландырыў қоры тамамланып, 01.11.2020-жылдан баслап хызметкерлердиң ис-ҳақылары ҳәм оларға теңлестирилген төлемлер Бюджет тәрепинен қаржыландырылыўы белгиленди.
Усыған тийкар, 16.12.2020-жылда мийнет шартнамалары бийкар етилген 360 хызметкерге (Өз.Р. Мийнет кодексиниң
109-статьясына тийкарланып) бир айлық жумыстан босатыў напақасы ушын 1 млрд. 506 млн. 641,5 мың сўм ажыратылды ҳәм хызметкерлердиң жеке пластик карталарына толық өткерип берилди. Бул өз гезегинде ӨзР Мийнет кодексиниң 67-статьясына муўапық хызметкерлердиң жумыс излеў дәўириндеги бир айлық компенсация түриндеги ис ҳақысы болып есапланады.
Соның менен бирге, бул хызметкерлерге Мийнет кодексиниң 102-статьясы 2-бөлимине муўапық, 2020-жыл 19-августқа шекемги болған ис ҳақылары ҳәм 151-статьясына тийкар пайдаланылмаған барлық жыллық тийкарғы ҳәм қосымша мийнет дем алыслары ушын 1 млрд. 50,2 млн. сўм муғдарында пуллы компенсациялар төлеп берилген.
Сондай-ақ, усы жылдың 19-январь күни, басқарма тәрепинен жергиликли мийнет бәнтликке көмеклесиў орайларында, он күн мүддет ишинде жумыс излеўши шахс сыпатында дизимнен өткенлигин тастыйықлаўшы мағлыўматнамаларына тийкарланып, 190 хызметкерге үшинши айы ушын орташа ис ҳақысын төлеп бериў бойынша 798 млн. 228,0 мың сўм ажыратып бериў бойынша Мәжбүрий орынлаў бюросы Орайлық аппаратына 14/18-7-128-санлы хаты жиберилип, қаржыландырыў мәселеси көрип шығылмақта.
Буннан тысқары, усы жылдың 20-январь күни, Бюроның Орайлық аппараты тәрепинен, Өзбекстан Республикасы Финанс министрлигиниң Мәмлекетлик финанслық қадағалаў Департаменти директоры атына, Бюджет қаржыларының мақсетли сарыпланыўын тәмийнлеў мақсетинде, талап етилип атырған қаржылардың нызамлылығын үйренип бериў жүзесинен хат пенен шығылды ҳәм усы Департамент тәрепинен аймақлық басқармасына бул бойынша үйренип бериў тапсырмасы берилген.
Айрықша атап өтиўимиз тийис, жоқарыдағы мәселелер бойынша ҳәзирги күнде жәми 3 орынлаў ҳүжжети ис жүритиўге келип түскен болып, булар бойынша орынлаў иси жүритиўлери қозғатылған ҳәм әйни усы себепли, пуқаралар менен олар басқарма имәратына келген ўақытта, орынлаў ҳүжжетлери менен тиккелей шуғылланып атырған районларара бөлим баслығы Б.Ережепов сәўбетлескен ҳәм олардың мәселелери көрилип атырғанлығын билдирген.

Ал, пуқараларды қабыллаў мәселеси бойынша тоқтап өтетуғын болсақ, елимизде карантин шаралары жеңиллетилгени менен толық бийкарланбағанлығы, сонлықтан, оларды басқарманың пуқараларды кабыллаў ханасында емес, бәлким келген жәми 14 пуқараның ҳәм хызметкерлердиң ден-саўлығын ойлаған ҳалда ашық ҳаўада қабыллаў шешимине келинди.
Жоқарыда баян етилгенлер бойынша, ғалаба ҳабар қураллары арқалы қосымша мағлыўмат берилетуғынлығын хабарлаймыз.
Өз нәўбетинде, Мәжбүрий орынлаў бюросы: бәрше рәсмий сайтлар ҳәм электрон мәлимлеме тарқатыўшы дереклерден әмелдеги “Журналистлик жумысты қорғаў ҳаққында” ғы Нызамында (6,15-статьялар) нәзерде тутылған мәжбүрият ҳәм жуўапкершилик принциплерине әмел етиўин сорап қалады.

Мәжбүрий орынлаў бюросы
Қарақалпақстан Республикасы басқармасы

You may also like

Comments are closed.