Журналистик суриштирув

Нөкисте жол тосылды. Электрон мәлимлеме алмасыў процессинде техник машқалалар жүз бергенлиги ушын төлемлер кешиккен

Kar.24.uz сайтында Нөкис қаласы, Шар базар (ески Әмиўдәрья бассейни жанында) алдындағы автомобиль жолды пуқаралар тосып алғанлығы бойынша хабар берген едик.
Бул жағдай бойынша Өзбекстан Республикасы Пенсия қоры Қарақалпақстан Республикасы басқармасы Kar24.uz сайтына рәсмий мағлыўмат берди.
Өзбекстан Республикасы Министрлер Кабинетиниң 2021-жыл 5-марттағы «Халықты социаллық қорғаў системасын және де жетилистириў, тараўға заманагөй мәлимлеме-коммуникация технологияларын кең енгизиў ис-илажлары ҳаққында»ғы 122-санлы қарарына муўапық АК «Халық банки» бөлими (филиалы) төлем әмелге асырылатуғын айдың 27-сәнесине шекем социаллық напақа алыўшыларға төлемлерди әмелге асырады.
Қарақалпақстан Республикасы бойынша 38,9 млрд сўм, соннан Нөкис қаласы 5,6 млрд сўм усы жылдың 27-май күни толық қаржыландырылды ҳәм ҳәзирги ўақытта төлемлер әмелге асырылмақта, деп атап өтилген басқарманиң берген мағлыўматында.
«Социаллық қорғаўдың бирден-бир реестри» мәлимлеме системасындағы 13 министрлик ҳәм мәкемелердиң айырымларында электрон мәлимлеме алмасыў процессинде техник машқалалар жүз бергенлиги ушын төлемлер усы айдың 25-сәнесинен баслап әмелге асырылып атыр. Системаны раўажландырыў ҳәм жетилистириў бойынша модернизация процесслери жолға қойылады ҳәм тез күнде төлемлердиң толық әмелге асырылыўы тәмийинленеди.
Басқарма пуқаралар менен жақыннан бирге ислесиўге тайын екенлигин ҳәм келтирилген қолайсызлықлар ушын кеширим сорайтуғынын мәлим етпекте.

Ҳәмире Кдырбаева,
Kar.24.uz сайты ушын арнаўлы таярлады.

You may also like

Comments are closed.