Янгиликлар

Еки мәрте мәс ҳалында автомашина басқарған пуқара жуўапкершиликке тартылды

Өзбекстан Республикасы Ҳәкимшилик жуўапкершилик ҳаққындағы Кодексиниң 131-статьясында (Транспорт қуралларын мәс ҳалда басқарыў) айдаўшылардың транспорт қуралларын алкоголли ишимликтен, нәшебентлик затлар тәсиринен ямаса өзгеше тәризде мәс ҳалда басқарыўы — транспорт қуралын басқарыў ҳуқықынан 1 (бир) жыл 6 (алты) айдан 3 (үш) жыл мүддетке шекем айырып, базалық есаплаў муғдарының 25 (жигирма бес) есеси муғдарында жәрийма салыўға себеп болады.
Жынаят ислери бойынша Нөкис қаласы суды тәрепинен пуқара Б.Сның қарсысына топланған ҳәкимшилик ис материаллары көрип шығылды.
Атап айтқанда, ҳуқықбузар Б.С 2021-жыл 04-апрель күни саат 18:20 лар шамасында Нөкис қаласы П.Сейтов көшесинде өзиниң басқарыўындағы «Нексия» маркалы автомашинасын Өзбекстан Республикасы «Жол ҳәрекети қағыйдалары»ның 12-бәнти талапларын бузып, спиртли ишимлик ишкен мәс ҳалында басқарып киятырғанында ҚР ИИМ ЖҲҚБ хызметкерлери тəрепинен иркилген.
Бул ис-ҳәрекетлери менен ҳуқықбузар Б.С Өзбекстан Республикасы Ҳәкимшилик жуўапкершилик ҳаққындағы Кодексиниң 131-статьясы 1-бөлиминде көрсетилген ҳуқықбузарлықты ислеген деп табылып, судтың 2021-жыл 29-апрель күнги қарары менен оған 1 (бир) жыл 6 (алты) ай мүддетке транспорт қуралын басқарыў ҳуқықынан айырыў жазасы менен базалық есаплаў муғдарының 25 (жигирма бес) есеси, яғный 6.125.000 сўм муғдарында жәрийма жазасы тайынланды.
Буннан басқа да, пуқара Б.С 2021-жыл 04-апрель күни ЖПХ инспекторлар тәрепинен иркилип өзиниң қарсысына ҳәкимшилик баяннама рәсмийлестирилгенлигинен өзине тийисли жуўмақ шығармастан, 2021-жыл 27-апрель күни саат 23:10 лар шамасында Нөкис қаласы А.Темур көшесинде өзиниң басқарыўындағы «Нексия» маркалы автомашинасын Өзбекстан Республикасы «Жол ҳәрекети қағыйдалары»ның 12-бәнти талапларын бузып, спиртли ишимлик ишкен мәс ҳалында басқарып киятырғанында ҚР ИИМ ЖҲҚБ хызметкерлери тəрепинен тәкираран иркилген.
Бул ис-ҳәрекетлери менен ҳуқықбузар Б.С Өзбекстан Республикасы Ҳәкимшилик жуўапкершилик ҳаққындағы Кодексиниң 131-статьясы 1-бөлиминде көрсетилген ҳуқықбузарлықты ислеген деп табылып, судтың 2021-жыл 19-май күнги қарары менен оған, тәкираран 1 (бир) жыл 6 (алты) ай мүддетке транспорт қуралын басқарыў ҳуқықынан айырыў жазасы менен базалық есаплаў муғдарының 25 (жигирма бес) есеси, яғный 6.125.000 сўм муғдарында жәрийма жазасы тайынланды.
Спиртли ишимлик ишип транспорт қуралын басқарыў пуқараларды тек ғана белгили ҳуқықтан ўақытша айырып қоймастан, ал оның материаллық жағдайына да белгили дәрежеде зыян келтиретуғынлығын жоқарыдағы жағдайлардан аңлаў қыйын емес.

Зыяда Исметуллаева
Жынаят ислери бойынша Нөкис қаласы судының судья жәрдемшиси 

You may also like

Comments are closed.