Янгиликлар

Бозатаўдағы өртке жалланба жумысшысының қәўипсизлик қағыйдасына әмел етпегенлиги себеп болды

2021-жыл 19-июль күни, саат 17:29да Бозатаў районы “Еркиндәрья” АПЖ аймағында жайласқан “Бозатаў суў тәмийнаты” филиалына қараслы болған “Қазанкеткен суў жеткерип бериў станциясы” аймағындағы ашық майданда өрт келип шығып, қуўраған от-шөплер ҳәм тереклер жанып зыянланған, деп мағлыўмат бермекте Қарақалпақстан Республикасы Айрықша жағдайлар басқармасы. Бул өртти сапластырыў ушын Қарақалпақстан Республикасы Айрықша жағдайлар басқармасынан 5 өрт-қутқарыў экипажы қатнасты.Ўақыя орнына Қарақалпақстан Распубликасы АЖБ басшылары, прокуратура, ИИБ ҳәм ҳәкимият ўәкиллери жетип барған.
Дәслепки сорастырыўларға қарағанда өрттиң келип шығыўына өрт қәўипсизлиги қағыйдаларына әмел етпегенлик себеп болған. Суў жеткерип бериў станциясының аймағын темир менен қоршап атырған ўақытта темир кесиўши аппараттан ушқын шығыўы нәтийжесинде өрт шыққан.
“З.Т.С” ЖШЖ ниң жалланба жумысшысы 1967-жыл туўылған пуқара Б.А. қәўипсизлик қағыйдасына әмел етпеген.
Ҳәзир Бозатаў районы Айрықша жағдайлар бөлими тәрепинен сорастырыў жумыслары алып барылмақта. Өрт нәтийжесинде келип шыққан материаллық зыян муғдары анықланип, жуўапкер шахсларға нызам шеңберинде шара көриледи.

You may also like

Comments are closed.