Қараөзекли спортшылар жеӊиси

Жас әўладтыӊ ҳәр тәреплеме жетиклигине ерисиўде физикалық тәрбия ҳәм спорттыӊ орны айрықша саналады. Әсиресе турақлы шынығыўлар арқалы физикалық ҳәм руўхый тәрептен раўажланыўлар көзге тасланып, инсан организминиӊ сыртқы тәсирлерге шыдамлылығы артып барады. Бүгингидей спорт дүнья кеӊ жәмийетшилиги итибарында болған дәўирде болса перзентлеримиздиӊ де өз қызығыўшылықларына қарап спорт пенен шуғылланыўы ҳәм жетискенликке ерисиўи тәбийий ҳалдай қабыл етиледи. Деген менен ҳәр қандай жетискенлик артында тынымсыз ҳәрекет ҳәм инта барлығын ескерсек, бүгин Қараөзек районы спортшыларыныӊ жетискенлигин де ҳәр қанша мақтаныш етсек арзыйды.

Районымызда миллий спорт түрлеринен бири өзбек жаўынгерлик өнерине қызығыўшы жас-өспиримлердиӊ өткен жылдағы табыслары және де жалғасып, усы жылда Өзбекстан чемпионатында төрт медалды қолға киргизгени айрықша жетискенлик болды.

Усы спорт түри бойынша Ташкент қаласында болып өткен жас-өспиримлер ҳәм ересеклер арасында Өзбекстан чемпионатына Қарақалпақстан сайланды командасы қурамында қатнасып қайтқан жети спортшыдан жәми еки алтын, бир гүмис ҳәм бир қола медалды қолға киргизиўи қуўанышлы жағдай әлбетте. Бунда тынымсыз шынығыўлар ҳәм оқыў-жыйыныныӊ өткерилиўи, және де бир қатар спортшыларымыздыӊ Өзбекстан ҳәм Қарақалпақстан сайланды командасы қурамына қабыл етилиўи де тосыннан емес. Республикамыздағы еӊ жоқары спорт жарысында биринши орынды райондағы 1-санлы мектеп оқыўшысы А.Ҳәбибуллаев, экономика ҳәм турмыс хызмети кәсип-өнер колледжи оқыўшысы Х.Палўановалар ийелеп, Өзбекстан чемпионы атанған болса, қыз балалар арасында райондағы 2-санлы қәнигелестирилген мектептен З.Оразбаева екинши, 6-санлы мектеп оқыўшысы Д.Алламбергенова үшинши орынларды ийелеўге еристи.

-Мен спорт пенен жети жылдан берли шуғылланып келмектемен. Усы жыллар ишинде дәслеп спорттыӊ Tаэквондо түринен Республика көлеминде сыйлы орынларды ийелеп, қара белбеў ийеси болған болсам, үш жылдан берли миллий спортымыздыӊ өзбек жаўынгерлик өнери түринен шынығыўлар алып бармақтаман. Өзбекстан көлеминде бириншилик ҳәм кубок ушын өткерилген спорт жарысларында, «Бәркамал әўлад» спорт ойынларында сыйлы орынларды ийелеп, бүгин екинши мәрте Өзбекстан чемпионлығын қолға кириттим. Сондай-ақ, усы спорт түринен де биринши дәрежели қара белбеў ийеси атандым. Ҳәзирде спорт федерацияныӊ Өзбекстан Республикасы Олий Мажлиси жанындағы мәмлекетлик емес коммерциялық емес шөлкемлер ҳәм пуқаралық жәмийетиниӊ басқа да институтларын қоллап-қуўатлаў жәмийетлик фонды қаржылары есабынан «Спорттыӊ өзбек жаўынгерлик өнери түрин Қараөзек районында ғалабалығына ерисиў» атамасындағы жойбары тийкарында райондағы 1-санлы мектепте шөлкемлестирилген спорт секциясында шуғылланып келемен. Алдағы мақсетим жоқары оқыў орнында оқыўымды даўам еттирип, спорттыӊ жекпе-жек түрлерин раўажландырыў ҳәм шәкиртлер таярлаў, саламат турмыс тәризин үгит-нәсиятлаўдан ибарат, – дейди Өзбекстан чемпионы, спорт усталығына талабан Ханзада Палўанова.

Бүгинги жас спортшыларымыздыӊ жеӊиси тек ғана районымыз емес, пүткил республикамыз ушын да мақтанышлы саналып, турақлы шуғылланыўлар, тынымсыз мийнет ҳәм қолайлы шараят арқалы ғана усындай жетискенликге ерисиў мүмкинлигин спортшыларымыз және бир мәрте дәлийлледи.

Қ.Жақсымуратов