​​«Ҳумо Арена» муз саройининг очилиш маросими бўлди

Байрамда Президент Шавкат Мирзиёев иштирок этиб, барчани ушбу қутлуғ воқеа билан табриклади.

«Ватанимиз спортчилари фигурали учиш, хоккей, тоғ чанғиси, фристайл, сноуборд каби энг томошабоп қишки спорт турларида ҳам муносиб иштирок этишларига интилмоқдамиз. Фристайл бўйича қишки Олимпия ўйинлари ва жаҳон чемпионатларидаги олтин медаллар, фигурали учиш бўйича Осиё ўйинлари ва бошқа халқаро мусобақаларда қўлга киритилган етмишдан ортиқ медал бу борадаги ютуқларимиздир. Биз ушбу шонли спорт анъаналарини давом эттиришни бурчимиз деб биламиз», — дея таъкидлади Президент ўз сўзида.

Маросимда Халқаро хоккей федерацияси президенти Рене Фазель, дунёга машҳур спортчи ва санъаткорлар Дима Билан, Алексей Басков ҳам иштирок этди.

Президент матбуот хизматининг ёзишича, «Ҳумо Арена» юқори тоифали спортчиларни тайёрлаш, йирик халқаро мусобақаларни ўтказиш, ёшларни спортнинг қишки турларига ҳам кенг жалб этишда муҳим омил бўлади. Кўп тармоқли спорт-кўнгилочар иншооти сифатида барча аҳоли қатламларининг жисмоний ва маданий камолотига хизмат қилади. Келгусида бундай мажмуаларни Ўзбекистоннинг бошқа ҳудудларида ҳам қуриш кўзда тутилган.