Вс. Окт 20th, 2019

Kar24.uz

Янгиликлар биздан бошланади

Устазлардан миннетдармыз

Адам туўылады, тәрбияланады, саўат ашады, өнер үйренеди, кәсип ийелейди, илим жолына түседи. Буның бәрин үйрететуғын устаз есапланады.
Устаз адамлардың көз-қарасын, исенимин қәлиплестиретуғын, оларға өмирден өз жолын табыўға жәрдемлесетуғын жәмийетлик ғайраткер, ойшыл инсан. Устазларымыз бизге шырайлы ҳәм жағымлы пазыйлетлерди береди, пайдалы нәрселерди үйретеди, ҳақыйқый инсанлық дәрежеге жеткериўши билим ғәзийнесин бизиң қәлбимизге сиңдиреди. Соның ушын да биз, устазларды атамыздай уллы санап, оларды айрықша сый-ҳүрметке бөлеймиз.
Данышпанларымыздың бири айтқан еди: «Егер шаңарақта әке саўатлы болса перзентлер саўатлы болады. Ал, егер ана саўатлы болса пүткил жәмийет саўатлы болады». Бул даналық гәп әйне устазларға қарата айтылған десек ҳасла алжаспаған боламыз. Себеби, шаңарақтағы ана тек ғана перзентлерин емес, ал, устаз болып пүткил халықтың балаларын тәрбиялап, оларды илим-билим жолына қарай жетелейди.
Бүгин жасларымыз илим, билим, мәденият, спорт тараўларында дүнья жаслары менен беллесип жоқары нәтийжеге ерискенде ҳәр бириниң гәпинде: «Бул табысларымның түп-тийкары устазларымның маған берген билимлери, тынымсыз алып барған шуғылланыўларымыздың арқасында усындай нәтийжеге еристим. Буның ушын устазларыма шексиз миннетдаршылығымды билдиремен» деген гәплерин көп мәрте еситип, гүўаси болғанбыз.
Әлбетте, бизиң бүгинги дәрежеге жетисиўимизге себепши болған, әдиўли устазлар!
Әзийз устазлар! Сизлерди бүгинги байрамыңыз бенен ҚМУ студентлери атынан шын жүрегимизден қутлықлаймыз. Ҳәр бириңизге узақ ҳәм мазмунлы өмир, шаңарақлық бахыт, беккем денсаўлық, машақатлы жумысларыңызда талмас күш жигер тилеймиз. Перзент ҳәм шәкиртлер камалын көрип жүребериң.
Гөззал Жалгасова,
ҚМУ студенти