Журналистик суриштирувИнтервьюМақолаларПост хабарФотофактЯнгиликлар

Кеўил билдириў: Белгили спорт устазы Бахи Жумамуратов дүньядан өтти

Бахи Жумамуратов 19-август күни белгили ветеран спортшы, спорт шебери, әдиўли устаз Бахи Жумамуратов узақ даўам еткен кеселлениўден соң 65 жасында қайтыс болды.
Б.Жумамуратов 1955-жылы 15-август күни Тахтакөпир районында туўылды. Нөкис мәмлекетлик педагогикалық институтының дене тәрбия факультетин питкергеннен соң, 1975-жылдан 1999-жылға шекем Нөкис қаласындағы 3-санлы қәнигелестирилген балалар ҳәм жас өспиримлер спорт мектебинде тренер, директор орынбасары, директоры, кейин ала Қарақалпақстан Республикасы Дене тәрбия ҳәм спорт бойынша мәмлекетлик комитетиниң баслығы лаўазымларында нәтийжели жумыс алып барып, республикамызда дене тәрбия ҳәм спортты раўажландырыўға, жасларымыз арасынан күшли спортшыларды тәрбиялап шығарыўға өзиниң салмақлы үлеслерин қосты.
Ол 2002-2016-жыллары аралығында пайтахтымыздағы 3-санлы қәнигелестирилген балалар ҳәм жас өспиримлер спорт мектеби, кейин балалар ҳәм жас өспиримлер олимпия резервлери спорт мектебиниң директоры ҳәм 2017-жылдан өмириниң ақырына шекем 1-санлы балалар ҳәм жас өспиримлер спорт мектебинде методист ҳәм Қарақалпақстан Республикасы «VETERAN SPORTSHI» мәмлекетлик емес коммерциялық емес шөлкеминиӊ баслығы лаўазымларын табыслы атқарды.
Сондай-ақ, ол узақ жыллар даўамында Нөкис педагогикалық училищесинде оқытыўшы, Қарақалпақ мәмлекетлик университетинде дене тәрбиясы кафедрасының үлкен оқытыўшысы ҳәм тренер ўазыйпаларын қосып атқарып, келешегимиз болған жасларды жетик кадрлар етип тәрбиялап шығарыў жолында аянбай мийнет етти.
Ол қай жерде, қайсы лаўазымда ислемесин, өзиниң терең билими, шөлкемлестириўшилик уқыбы, адамлар менен әлпайым ислесиўи арқасында ҳүрмет-абыройға еристи.
Оның таярлаған көплеген шәкиртлери республикалық ҳәм халық аралық жарысларда жеңимпазлар қатарынан орын алып, елимиздиң байрағын жоқары көтериўге миясар болды.
Белгили спорт ветераны, әдиўли устаз Бахи Жумамуратовтың жарқын естелиги бизлердиң ядымызда узақ ўақыт сақланып қалады.

Олимпия ҳәм миллий спорт түрлери бойынша қәнигелестирилген Нөкис жоқары спорт шеберлиги мектебиниң жәмәәти

You may also like

Comments are closed.