Янгиликлар

Лицензиясыз автотранспорт хызметин көрсеткенлиги ушын қандай жарийма бар екенин билесиз бе?

Өзбекстан Республикасы Ҳәкимшилик кодексиниң 176 – статьясының 3-бәнтине муӯапық халыққа лицензиясыз автотранспорт хызметин көрсеткенлиги ушын пуқараларға ең кем айлық ис хақының 20 есесинен 100 есесине шекем, ал әмелдар шахсларға ең кем айлық ис хақының 50 есесинен 150 есесине шекем жарийма қолланыӯ белгиленген.
Ал, 165-статьяда болса, арнаӯлы лицензиясыз хәм басқа да рухсат бериӯши хүжжетлерсиз хызмет көрсеткенде пуқараларға ең кем айлық ис хақының 5 есесинен 10 есесине шекем, ал әмелдар шахсларға 10 еседен 20 есеге шекем жәрийма муғдары белгиленген.
Жоқарыда көрсетилген ҳәкимшилик ҳуқықбузарлық жаза шарасы қолланылғаннан кейин бир жыл даӯамында және қайталанған жағдайда, пуқараларға ең кем айлық ис ҳақының 10 есесинен 20 есесине шекем, ал әмелдар шахсларға 20 еседен 30 есеге шекем жәрийма муғдары қолланылады.

Деген менен ҳәзирги ӯақытта айырым транспорт басқарыӯшылары нызам талапларына бойсынбастан, арнаӯлы лицензиясыз халыққа хызмет көрсетиӯ жағдайлары ушыраспақта. Бул бойынша Қарақалпақстан Республикасы Транспорт министрлигиниң автомобиллерде тасыӯлар қәӯипсизлигин тәмийинлеӯди бақлаӯ бөлиминиң қала хәм районлардағы сектор инспекторлары тәрепинен рейд илажлары өткерилип келинбекте. Усы жылдың январь айынан баслап бүгинги күнге шекем 967 рейд илажлары өткерилди. Өткерилген рейд нәтийжесинде нызам бузыӯшылық жағдайлары анықланып, 2286 дана тийисли баяннама расмийлестирилди, ал айырым автотранспорт қураллары ӯақтынша жәрийма майданшасына қойылды. Усы нызамсыз жүрген автомобиллердиң 352 данасына арнаўлы лицензия карточкаларын алдырыўға ерисилди. Ал қалғанлары ҳәкимшилик судына өткерилди.
Усындай нызам талапларын бузған автотранспорт басқарыӯшыларына тийисли тәртипте жәрийма жазасын белгилеӯ бойынша Қарақалпақстан Республикасы Транспорт министрлигиниң имаратында суд мәжлиси болып өтти. Қараөзек районы жынаят ислери бойынша судының судясы Женис Алланиязов басшылығында суд процесси өткерилип, нызам талаплары тийкарында 40 пуқараға тийисли шаралар көрилди.

Қ Р Транспорт министрлиги мәлимлеме хызмети

You may also like

Comments are closed.