Ср. Фев 26th, 2020

Kar24.uz

Янгиликлар биздан бошланади

Өзбекстан Республикасы Әдиллик министрлигинде компьютерлер өширилмекте. Неге?


Мийнет нызамшылығы, атап айтқанда ис режими бойынша нормалар жыллар даўамындағы терең илимий ҳәм әмелий изертлеўлер тийкарында инсан ықтыяжы ҳәм имканиятларынан келип шыққан ҳалда қәлиплескен. Сондай-ақ, мийнет нызамшылығы тараўында жоқары стандартлардың әмел етиўи бирдей миллионлаған жумысшы ҳәм хызметкерлердиң турмысына тәсир етеди.
Сондай болсада, көплеген мәмлекетлерде, атап айтқанда жеке шөлкемлерде узақ жумыс режимлеринде жумыс ислеў машқаласы бар. Ҳәммеге белгили, Япония, Қубла Корея, ҒМДА мәмлекетлери ҳәм басқаларда усы уқсаған машқалалар инсанлар турмысына кери тәсир етип атырғаны бойынша көплеген мағлыўматлар ҳәм излениўлер бар. Өзбекстанда да жумыс ўақты машқаласы сыр емес, әлбетте.
Бақлаўларға көре, артықша жумыс ислеў қысқа мүддетли режелер ушын қандайда бир хызмет етсе де, жоқары нәтийжели мийнет ҳәм мазмунлы турмыс искерлигин жолға қойыў жолында, сондай-ақ үлкен стратегиялық мақсетлер ушын кери тәсир көрсетеди. Атап айтқанда:
• хызметкерлердиң мийнет өнимдарлығы пәсейиўине;
• жумыс ўақтының дурыс емес режелестирилиўине;
• энергия ресурсларының артықша сарпланыўына;
• хызметкердиң шаңарақлық машқалаларға дус келиўине ҳәм социаллық көнликпелерге кери тәсир етиўине алып келеди.
Усы себепли жоқарыдағы машқалаларды инабатқа алып, тәжирийбесин үйренген ҳалда, Өзбекстан Республикасы Әдиллик министрлиги мийнет өнимдарлығын асырыў мақсетинде комплекс ис-илажлар дәстүрин ислеп шықты.
Бул дәстүрдиң бир илажы сыпатында хызметкрелерди күн даўамында өз искерлигин дурыс режелестириў бойынша түсиниклер берилип, тайм менежменттиң жаңа заманагөй моделлеринен пайдаланыў илгери сүрилмекте.
Хызметкерлер жумыс ўақты тамамланғаннан кейин өз искерлигин тамамлаў талап етилмекте. Ең кескин илаж сыпатында болса принципиал жантасыў тийкарында жумыс күни ақырында барлық хызметкерлердиң хызмет компьютерлери автоматикалық рәўиште тармақтан үзип қойылыў тәртиби де киргизилди. Бул жағдайда хызметкерге өз-өзинен жумысын тамамлаўға туўра келеди.
Буннан тысқары, екшемби күни хызметкерлердиң жумысқа шығыўы қадаған етилген. Бул талаптың орынланыўы қатаң қадағаланбақта. Яғный, хызметкер көрсетпеге әмел етпестен жумыс орнына келсе де ол имаратқа киргизилмейди.
Бул илажлар нәтийжесинде хызметкерлер жумыс ўақтынан үнемли пайдаланыўға ҳәмде мийнет процессин оптимал режелестириўге мәжбүр болмақта ҳәм бул өз жемисин бермекте. Өз ўақтында шаңарағына қайтқан, жетерли дем алып, позитив энергияға ийе болған хызметкерлердиң мийнет өнимдарлығы артып бармақта.
Ҳәзир министрликте кадрлар менен ислесиўдиң заманагөй KPI системасы тийкарында жумыс шөлкемлестирилип, ҳәр бир хызметкердиң мийнет өнимдарлығы индивидуал рәўиште баҳалап берилмекте. Бул да өз нәўбетинде жумыс процессине унамлы тәсир көрсетпекте.
Мақсет нәтийжели, заманагөй ҳәм қәтесиз жумыс ислеў системасына өтиўден ибарат.

Әдиллик министрлиги