Ср. Фев 26th, 2020

Kar24.uz

Янгиликлар биздан бошланади

Тахтакөпир районында пуқараға жәрийма салынған, бирақ, ол бийхабар, пуқараның ҳуқықы қалай тикленеди?

Тахтакөпир районы Әдиллик бөлимине пуқара Р.Н арза менен мүрәжат етти.Ол өз мүрәжатинде басқарыўдағы мәмлекетлик номери 70 J 535 NA COBALT автотранспортында 2018-жыл 28-сентябрь күни Бухара қаласында кейинги күни болса, Самарқанд қаласында белгиленген тезликти асырғаны ушын еки ҳалатта да 921.500 сумнан жәрийма салғанын,бирақ айдаўшы сол жәриймалардан улыўма хабары болмағанын баян етеди. Сондай-ақ, ол Тахтакөпир районы Мәжбүрий орынлаў бюрсы хызметкерлери Р.Н жасаў мәнзилинде жоқ ўақытта келип, оның шаңарақ ағзаларына жәрийма төлеў шәртлигин,сол себептен үйде бар болған буйымларды хатлап,шаңарағында кредит есабына алған жаңа газ плитасын ҳәм кондиционер үскенелерин ҳеш бир акт дүзбестен күш пенен алып кеткенлигин жазады.
Үйрениў даўамында фоторадар арқалы дизимге алынған ҳәкимшилик нызамбузыўшылық ҳалатлары бойынша жәрийма салыў ҳаққындағы суд қарарлары негизинде автомобильдиң ҳақыйқый ийеси Қ.Ш ға қарата тайынланғанлығы анықланды. Яғный Қ.Ш тәрепинен Р.Н атына 2018-жыл 20-сентябрьде AJ 379943 QS номерли исеним хат (автомашинаны басқарыў ҳәм сатыў ҳуқықы менен) берилген болып,бул исеним хат тийкарында автомашина пуқара Р.Н басқарыўында болған.
Итибар бериң нызамбузыўшылық ҳалаты бойынша Бухара Самарқанд ўәлаятлары ИИБ жол ҳәрекети қәўипсизлиги басқармасы тәрепинен өткен жыл яғный 11-февраль күни жариймаларды өндириў бойынша Мәжбүрий орынлаў бюросының Қарши районы бөлимине жиберилген.
Нызамшылыққа тийкар жол ҳәрекети қағыйдаларын бузғаны ушын ҳуқықбузыўшы жәрийма салыў ҳаққындағы қарар шығарылған күннен 60 күннен кешиктирмей төлеўи белгиленген. Сондай-ақ, Әдиллик министрлигинен 2011-жылда дизимнен өткен Ишки ислер министрлигиниң 2011-жыл 31-майдағы “Жол ҳәрекети қағыйдаларының бузылыўына тийисли ҳәкимшилик ислерин көрип шығыў тәртиби ҳаққындағы Қолланбаны тастыйықлаў ҳаққында”ғы буйрығында “егер ҳәкимшилик жаза қолланыў ҳаққындағы қарар шығарылған күннен баслап үш ай даўамында орынланыўға қаратылмаған (қарар нусқасы ҳуқықбузыўшыға тапсырылмаған,ислеў,жасаў орнына яки мәмлекетлик орынлаўшыға жиберилмеген) болса, бундай қарар орынланбайды. ”Бундай жағдай бойынша хызмет тексериўи өткериледи ҳәм айыпкер лаўазымлы шахсқа қарата тийисли интизамий шара көрилип,ол ҳаққындағы мағлыўмат ҳәкимшилик ис ҳүжжетлерине қосып қойылады”-деп белгиленген.
Деген менен,Бухара ҳәм Самарқанд ўәлаятлары ИИБ Жол ҳәрекети қәўипсизлиги басқармасы тәрепинен белгиленген жәрийма салыў ҳаққындағы қарарлары 60 күн ишинде емес,бәлки 135 күн өтип яғный 2019-жыл 11-февральда Қарши районы мәжбүрий орынлаў бюросына жиберилип,орынлаўга қаратылған. Жоқарыда айтылғанындай Р.Н ның үйинен мал-мүлки хатланған.
Мәжбүрий орынлаў бюросы Тахтакөпир районы бөлими тәрепинен Бухара ҳәм Самарқанд ўәлаятлары ИИБ Жол ҳәрекети қәўипсизлиги басқармасы тәрепинен жәрийма салыў бойынша қарарлары орынлаў мүддети өткеннен соң келген болсада “Суд ҳүжжетлери ҳәм басқа органлар ҳүжжетлерин орынлаў ҳаққында”ғы Нызам талаплары бузылған.
Буннан тысқары Мәжбүрий орынлаў бюросы Тахтакөпир районы бөлими мәмлекетлик орынлаўшы тәрепинен 2019-жыл 2-июль күни орынлаў исин қозғаў ҳаққындағы қарар қабыл етилген болса да, пуқара Р.Н ға орынланыў күнине шекем берилмеген. Нусқасы ол шығарылған күнниң ертеңинен кешиктирмей өндириўшиге,қарыздарға сондай-ақ, ҳүжжети орынланыўы лазым болған суд яки басқа органға жиберилиўи керек еди. Яки мәмлекетлик орынлаўшы тәрепинен пуқара Р.Н ға орынлаў ҳүжжетиниң ықтыярий орынланыўы ушын тийисли тәртипте мүддет берилмеген.
Жоқарыдағы ҳәрекетлер тийкарында Тахтакөпир районы ҳәкимшилик ислер бойынша судына шағым арзасы киргизилип, судтың 2019-жыл 29-октябрьдеги бийлигине тийкар, район әдиллик бөлиминиң пуқара Р.Н ның мәплерин гөзлеп киритилген шағымы қанаатландырылды. Жуўмақлап айтқанда Тахтакөпир районы мәжбүрий орынлаў бюросының 2019-жыл 2-июлдағы орынлаў исин жүритиўди қозғаў ҳаққындағы бийлиги ҳақыйқый емес деп табылды.

                                                                 Қарақалпақстан Республикасы Әдиллик министрлиги