Вс. Фев 23rd, 2020

Kar24.uz

Янгиликлар биздан бошланади

АВТОМОБИЛЬЛЕРДЕ ЖҮКЛЕРДИ ҲӘМ ЖОЛАЎШЫЛАРДЫ ТАСЫЎ ХЫЗМЕТИН ЛИЦЕНЗИЯЛАЎ ТӘРТИПЛЕРИН БИЛЕСИЗБЕ?


Соңғы жылларда мәмлекетимизде халыққа хызмет көрсетиў тараўын және де раўажландырыў, бул бағдарда физикалық ҳәм юридикалық тәреплерге қолайлықлар жаратып бериў мақсетинде кең көлемли реформалар әмелге асырылмақта. Бул бағдардағы жумыслардың нәтийжелилигин тәмийинлеў Ҳүкиметимиз тәрепинен бир қатар қарарлар менен ҳуқықый-норматив ҳүжжетлер қабыл етилип, әмелиятқа енгизилмекте.
Усындай ҳуқықый ҳүжжетлердиң бири сыпатында 2019-жыл 30-июль сәнесинде қабыл етилген Өзбекстан Республикасы Министрлер Кабинетиниң «Автомобиль транспортында жолаўшыларды ҳәм жүклерди қалада, қала әтирапында, кала аралық ҳәм халықаралық жөнелислер бойынша тасыў жумысын лицензиялаў бойынша мәмлекетлик хызметлер көрсетиўдиң ҳәкимшилик Регламентин тастыйықлаў ҳаққында»ғы қарарын да атап өтиўимиз орынлы. Қарар менен автомобиль хызметин көрсетиў бойынша тәртип–қағыйдалар, хызмет көрсетиўшилердиң ўазыйпалары менен миннетлемелери анық белгилеп қойылған.
Сондай–ақ, Регламентте автомобильлерде хызмет көрсетиўши юридикалық ҳәм физикалық шахсларға Мәмлекетлик хызметлер орайлары арқалы мәмлекетлик хызметлер көрсетиўди тәртипке салыў мақсетинде – мүрәжатларды дизимге алыў ҳәм ўәкилликли уйымларға жибериў тәртиплери де белгилеп берилген.
Бунда автомобильлерге хызмет көрсетиўши тәреплер лицензия алыў ушын мәмлекетлик хызметлерди көрсетиў орайына тийкарынан төмендеги ҳүжжетлерди:
– юридикалық шахслар ушын – юридикалық шахстың атамасы ҳәм шөлкемлестириў–ҳуқықый формасы, жайласқан орны (почта мәнзили), банктеги есап бети ҳәм банктың атамасы;
– физикалық шахс болса (жеке тәртиптеги исбилермен) жүк тасыў ҳуқықына лицензия алыўда – фамилиясы, аты, әкесиниң аты, паспортына ҳәм айдаўшылық гүўалығына байланыслы мағлыўматлар, жумысларының лицензияланатуғын түри көрсетилген жағдайда лицензия бериў ҳаққындағы сораўнама ҳәм де лицензия қағазын алыў ушын кәрхана ықтыярында болған автотранспорт қуралларының дизими менен бирге автотранспорт қуралларының мүлк ҳуқықы яки ижара тийкарында тийислилиги ҳаққындағы мағлаўматларды усынады.
Буннан тысқары, арза бериўшиде айдаўшыларды медициналық тексериўден ҳәм автотранспорт қуралларын техникалық көриктен өткериў ямаса арза бериўшиниң тийисли қәнийгеликтеги шөлкем менен оған медициналық ҳәм техникалық көриктен өтиў бойынша имканият жаратып берилиўи ҳаққындағы шәртнамасы бар екенлиги бойынша мағлыўматларды да усынады.
Арза бериўшиден усы регламентте нәзерде тутылмаған ҳүжжетлерди талап етиўге жол қойылмайды ҳәм арза бериўши өзи тәрепинен усыныс етилип атырған мағлыўматлардың туўрылығы менен ҳақыйқыйлығы ушын жуўапкер болып есапланады.
Автотранспортта хызмет көрсетиў ушын лицензия алыўда арза бериўши мәмлекетлик хызметлерден пайдаланыўда Мәмлекетлик хызметлер орайларына өзлери келип мүрәжат етеди ямаса мәмлекетлик хызметлерден электрон тәризде пайдаланыў ушын бирден-бир интерактив мәмлекетлик хызметлер порталы арқалы дизимнен өтеди ҳәм тийисли тәртиптеги сораўнаманы толтырады. Сораўнама толтырылғаннан кейин арза бериўши ондағы мағлыўматлардың туўрылығын тексерип көрип, өзиниң электрон санлы имзасы менен тастыйықлайды. Бул басқышта арза бериўшиден басқа ҳеш қандай ҳүжжет талап етиўине жол қойылмайды.
Азра бериўшиге мәмлекетлик хызметлер көрсетилгени ушын нызам ҳүжжетлеринде белгиленген ең кем айлық ис ҳақының бир есеси муғдарында жыйым ҳәм автомобиль транспортында жолаўшыларды ҳәм жүклерди қалада, қала әтирапында, кала аралық ҳәм халықаралық жөнелислер бойынша тасыў жумысын әмелге асырыў бойынша лицензиялаў қағазын бериў ушын Өзбекстан Республикасы Министрлер Кабинети тәрепинен белгиленген муғдарда мәмлекетлик бажы өндириледи.
Мәмлекетлик хызметлерди көрсетиў ушын жыйым төленгенлигин тастыйықлаў мәлимлеме коммуникация системасы арқалы әмелге асырылады.
Сондай–ақ, арза бериўши мәмлекетлик хызметлерден пайдаланыўдан ҳәр қандай басқышта бас тартыў ҳуқықына ийе. Бунда тутыныўшының толтырған сораўнамасы көрместен қалдырылады ҳәм төленген жыйым сўммасы қайтарылмайды.
Мәмлекетлик хызметлер орайына жеке өзи барып мүрәжат етилгенде сораўнама толтырылғаннан кейин бир саат даўамын да сораўнама автомат тәризде лицензиялаўшы уйымға келип түседи. Ал, лицензиялаўшы уйым сораўнама келип түскен пайыттан баслап бир жумыс күни даўамында:
электрон тәризде Өзбекстан Республикасы Ишки ислер министрлигинин Жол ҳәрекети қәўипсизлиги басқармасынан лицензия қағазын алыў ушын усыныс етилип атырған автотранспорт қуралларына тийисли мағлыўматларды, Өзбекстан Республикасы Әдиллик министрлигинен мүлк ҳуқықы ямаса шәртнама тийкарындағы автотранспорт қураллары ҳаққындағы мағлыўматларды алады. Лицензиялаўшы орган болса тийисли тәртипте арза бериўши тәрепинен усыныс етилип атырған мағлыўматлардың толықлығын ҳәм лицензия талапларына муўапықлығын үйренип шығады.
Арза бериўши тәрептен лицензия қағазын бериў ушын төлемлер белгиленген мүддетте төлемеген жағдайда, арза бериўши улыўма тәртипте қайтадан мүрәжат етиўге ҳақылы.
Бул жаңа Регламент тийкарында қабыл етилген тәртип, қағыйдалар менен жаратылып берилип атырған жеңилликлер автотранспорт тараўында хызмет көрсетиўши исбилерменлерге бүгинги дәўир талаплары тийкарында сапалы мәмлекетлик хызметлер көрсетиўден ибарат болып табылады.

Мәмлекетлик хызметлер агентлиги
Қарақалпақстан Республикасы басқармасы