Янгиликлар

Президент Қарақалпақстан медицина институтын шөлкемлестириў ҳаққындағы қарарға қол қойды

Президент Шавкат Мирзиёев Қарақалпақстан ушын әҳмийетли және бир қарарга қол қойды. Қабыл етилген жаңа қарар менен Ташкент педиартия медицина институты Нөкис филиалы негизинде Қарақалпақстан медицина институты шөлкемлестириледи.
Қарар Аралбойы аймағы ушын медицина тараўында жоқары тәжирийбели кадрлар таярлаў системасын және де жетилистириў, аймақ халқына көрсетилип атырған медицина хызметиниң сапасы ҳәм көлемин арттырыў, медициналық әмелияттың илим менен өз-ара беккем интеграциясын тәмийнлеў, тараўдағы жетискенлик ҳәм инновацияларды емлеў-диагноз процессине енгизиў мақсетлерине бағдарланған болып, оған муўапық Ташкент педиатрия медицина институты Нөкис филиалы негизинде Қарақалпақстан медицина институты ҳәмде Қарақалпақстан медицина институты клиникасы шөлкемлестириледи.
Ҳәзирги күнде Ташкент педиатрия медицина институты Нөкис филиалында 7 бакалавриат, 3 магистратура, 30 ординатура қәнигеликлери бойынша 1825 студент билим алмақта. Филиалдың профессор-оқытыўшылар қурамы 158ди қурайды. Филиал бүгинги күнде Аралбойы аймағының тар қәнигеликтеги шыпакерлерге болған талабын қанаатландырыў имканиятына ийе емес.
Қарарға ҳәм Өзбекстан Республикасы жоқары билимлендириў системасын 2030-жылға шекем раўажландырыў концепциясына муўапық иституттың тийкарғы жөнелислери белгиленди. Олар қатарында үзиликсиз медициналық кәсиплик билимлендириў системасында жоқары тәжирийбели медицина кадрларын таярлаў, қайта таярлаў ҳәм қәнигелигин асырыў, оқыў процессин әмелий көнликпелерин қәлиплестириўге бағдарлаў, халықаралық тәлим стандартларына тийкарланған оқыў-методикалық материалларды кең еңгизиў, клиника ҳәм оқыў базасында теориялық билим ҳәмде әмелияттың үйлесимлилигин тәмийнлеў ушын зәрур шәраятлар жаратыў;
Фундаментал, әмелий ҳәм инновациялық илимий-изертлеў жумысларын медицина әмелиятындағы бар болған машқалалардың шешимине қаратыў ҳәм басқа да бир неше функцияларды әмелге асырады.

You may also like

Comments are closed.