Пн. Мар 30th, 2020

Kar24.uz

Янгиликлар биздан бошланади

Қарақалпақстандағы улыўма аўкатланыў орынлары жумыслары ўақытша тоқтатылды

Елимизге короновирус пандемиясының кирип келиўи себепли барлық орынларда карантин ҳалаты енгизилди.
Атап айтқанда, Өзбекстан Республикасы Министрлер Кабинетиниң “Короновирус инфекциясының тарқалыўына қарсы қосымша илажлар ҳаққында”ғы қарарына муўапық, республикамыз аймағындағы бәрше аўқатланыў орынлары атап айтқанда, кафе, асхана, шайхана ҳәм басқа бир қатар исбилерменлер жумыслары тоқтатылыўы белгиленген.
Бул илажлардан гөзленген тийкарғы мақсет болса, пуқаралардың пәраўанлығын ҳәм қәўипсизлигин тәмийинлеў, короновирус инфекциясы тарқалыўының алдын алыў болып табылады.
Қарар талапларын орынлаў мақсетинде Қарақалпақстан Республикасы мәмлекетлик салық хызмети ҳәм бирге ислесиўши тийисли органлар хызметкерлери менен биргеликте алып барылган илажлар натийжесинде 20-23 март күнлери республикадағы барлық улыўма аўқатланыў объектлериниң жумыслары ўактынша тоқтатылыўы тәмийинленди.
Мағлыўмат орнында атап өтиў орынлы, республика бойынша Мәмлекетлик салық хызмети, Ишки ислер ҳәм Миллий гвардия органлары хызметкерлеринен ибарат 60 исши топар дүзилди.
Соның менен бирге, адамлар көп топланатуғын той-мәресимлер өткерилетуғын 793 субъектке қараслы 919 улыўма аўқатланыў объектлери, соннан 739 улыўма аўқатланыў шақапшалары, 41 ресторан ҳәм 10 кафе баслықлары менен түсиндириў жумыслары алып барылып, бул орынлар карантинге алынды.
Бундай короновирус пандемияси шараятында аўқатланыў орынларының карантин себепли жумысларын ўақытша тоқтатып турыў бойынша ҳәзирде исбилерменлер арасында профилактикалық түсиндириў жумыслары даўам етпекте.
Əлбетте, бул халқымыз ушын сынаўлы дәўир. Короновирус пандемиясы енгизилген карантин дәўиринде ҳүрметли ўатанласларымыздан көбирек ўақытларын өз үйлеринде өткерип, жеке гигиена талапларына әмел еткен ҳалда өзи ҳәм шаңарақ ағзаларының денсаўлықларына итибарлы болыўға шақырып қаламыз. Үйде өткерилген ўақыт болса, өз нәўбетинде жақынлар, шаңарақ ағзалаларға ҳәм перзентлер тәрбиясына көбирек итибар қаратыўға мүмкиншилик берери, сөзсиз.

Қарақалпақстан Республикасы
мәмлекетлик салық басқармасы
Мәлимлеме хызмети