Сб. 30 мая, 2020

Kar24.uz

Янгиликлар биздан бошланади

ӨзМТДП Нөкис қалалық Кеңеси баслығы: «Карантин қағыйдаларына әмел еткен ҳалда жумыслар алып барылмақта»

Президент Шавкат Мирзиёев 7-май күни өткерилген видеоселектор мәжилиси алдынан коронавирус пандемиясына қарсы гүресиў бағдарында мәмлекетимизде әмелге асырылып атырған жумысларға айрықша тоқтап өтти.
Биз оғада үлкен күш жумсап, көп ҳәрекетлер, халқымыздың жәрдеми ҳәм терең түсиниўи, сабыр-қанааты менен Өзбекстанда бул апатшылықты сапластырмақтамыз. Бирақ бәрибир оғада зийреклик ҳәм абайлылық пенен, карантин қағыйдаларына толық әмел етиўимиз шәрт. Бул қәўип пүткил дүнья жүзинде сапластырылмайды екен, қәтержамлыққа берилиўге ҳаққымыз жоқ,-деген еди ел басшымыз өз сөзинде.

Бүгинги күни мәмлекетимизде коронавирус пандемиясы менен гүресиў ҳәм оның тарқалып кетиўиниң алдын алыў, сондай-ақ карантин дәўиринде жаслардың бос ўақтын мазмунлы өткериў бойынша кең көлемли иләжлар алып барылмақта.
Солар қатарында Өзбекстан «Миллий тикланиш» демократиялық партиясы Нөкис қалалық Кеңеси тәрепиненде карантин дәўиринде белгиленген иш-режелер тийкарында онлайн түрде бир қатар ис-илажлар әмелге асырылмақта. Мәселен карантин дәўиринде жасларымыздың бос ўақытларын мазмунлы өткериў ҳәм өнер үйретиў мақсетинде «Хызмет-бийминнет» жойбары тийкарында партияның белсенди ағзалары ҳәм қолы гүл өнерментлеримиз тәрепинен телеграмм группаларында онлайн түрде кестелеў, дуўтар шертиў, дуўтар соғыў, тоқыма тоқыў, қурақ қураў сыяқлы өнер түрлери бир қанша жасларға бийминнет пулсыз үйретилип атыр.

Сондай-ақ, партияның «Жаслар қанаты», «Ҳаяллар қанаты» тәрепинен «Кеўилли карантин» жойбары тийкарында телеграммда канал ашылып таңлаў жәрияланды.
«Видео ролик», «Мен салған сүўрет»
«Фото», «Пәзендешилик», «Тигиў-пишиў» жөнелислери бойынша күш сынасқан жасларымыз арасынан ең көп даўыс жыйнаў арқалы анықланған жеңимпазларымызға диплом ҳәм саўғалары карантин жуўмақланғаннан кейин тапсырылыў режелестирилди.
Соның менен бирге Халық депутатлары Нөкис калалық Кеңесине партиядан сайланған депутатлық топары ағзаларыда бир қанша унамлы жумысларды әмелге асырмақта. Карантин дәўиринде халыққа қолайлықлар жаратыў мақсетинде турақлы түрде азық-аўқатлық өнимлерин арзанластырылған баҳада жеткерип бермекте. Сондай-ақ, депутатларымыз Өзбекстан Республикасы Президентиниң басламасы менен шөлкемлестирилген «Сақаўат ҳәм көмек» улыўмахалықлық ҳәрекетин қоллап-қуўатлап, кем тәмийнленген шаңарақлардың ҳал-жағдайынан хабар алып, өз есабынан пуллай ҳәм азық-аўқат өнимлерин тарқатпақта.
Президентимиз мүрәжатинде ең баслы мәселе бул халқымыздың қәўипсизлиги ден-саўлығын сақлаў, ҳеш бир инсан итибардан шетте қалмайтуғынлығы, инсан мәпи биринши орында екенлигин айтып өткен еди.
Солай, екен ҳәр биримиз карантин ҳәм санитариялық-гигиеналық қағыйдаларға қатаң әмел етип, өзимиз, жақынларымыз ҳәм халқымыздың денсаўлығын қорғаў ушын жуўапкер екенимизди умытпаўымыз зәрүр.

Айзада Нурумбетова
ӨзМТДП Нөкис қалалық Кеңеси баслығы