Mámleketlik medicina mákemelerinde autsorsing (awqatlanıw, tazalaw hám basqa da xızmetler) Ministrler Kabinetiniń 16-sanlı hám 306-sanlı qararları tiykarında engizilgen. Házirgi jaǵdayda 32 medicina shólkemi catering hám kir juwıw xızmetleri ushın jeke menshik kompaniyalar menen birgelikte isleydi. Xızmet kórsetiwshi subektler «Mámleketlik satıp alıwlar haqqında»ǵı nızamǵa muwapıq tender tiykarında, bahanı únemlew hám finanslıq turaqlılıq kriteriyaları boyınsha tańlanadı. Sapalıqtı qadaǵalaw ishki komissiyalar tárepinen alıp barıladı; shártnama buzılǵanda aylıq bahasınıń 50 procentine shekem penya tólenedi hám qáwipsizlik qaǵıydaları sezilerli buzılsa, shártnama biykar etilip, isbilermen «qara dizim»ge kirgiziledi. Autsorsing mámleketlik organlardı artıqsha jeke quram qárejetleri hám xojalıq qárejetlerinen azat etip, finanslıq nátiyjelilikti arttıradı.Mámleketlik medicina mákemelerinde autsorsing tiykarında kórsetilip atırǵan xızmetlerdiń sapasın úyreniw hám shártnama shártleriniń orınlanıwın qadaǵalaw boyınsha Qaraqalpaqstan Respublikası Densawlıqtı saqlaw ministrligine rásmiy soraw jiberdik. Mámleketlik medicina mákemelerinde autsorsing xızmetlerin (awqatlanıw, tazalaw, dezinfekciya hám basqalar) engiziw qaysı normativlik-huqıqıy hújjetler hám talaplar tiykarında ámelge asırıladı?Mámleketlik medicina mákemelerinde autsorsing xızmetlerin engiziw (awqatlanıw, tazalaw, dezinfekciya, ornatılǵan úskenelerge texnikalıq xızmet kórsetiw hám basqalar) tómendegi tiykarǵı normativlik-huqıqıy hújjetlerge súenedi: Ózbekstan Respublikası Ministrler Kabinetiniń 2020-jıl 10-yanvardaǵı 16-sanlı Ózbekstan Respublikası Densawlıqtı saqlaw ministrligi strukturasındaǵı shólkemlerde autsorsing xızmetlerin kórsetiw tártibi haqqındaǵı qararı. Ózbekstan Respublikası Ministrler Kabinetiniń 2026-jıl 12-iyundaǵı 306-sanlı «Atqarıw hákimiyatı uyımları hám mámleketlik kárxanalarda autsorsing xızmetlerin shólkemlestiriw mexanizmlerin jetilistiriw ilajları haqqında»ǵı qararı.Ózbekstan Respublikasınıń 2021-jıl 22-apreldegi «Mámleketlik satıp alıwlar haqqında»ǵı Nızamı. Sanitariya qaģıydaları, normaları hám gigienalıq normativler. Autsorsing xızmetlerin kórsetiw ushın isbilermenlik subektlerin tańlap alıw (tender yamasa mámleketlik satıp alıwlar) qaysı normalar boyınsha ótkeriledi? Qatnasıwshılarǵa qoyılatuǵın tiykarǵı mamanlıq talapları qanday? Isbilermenlik subektlerin tańlap alıw Ózbekstan Respublikasınıń 2021-jıl 22-apreldegi «Mámleketlik satıp alıwlar haqqında»ǵı Nızam talaplarına muwapıq elektron mámleketlik satıp alıwlar (tender, tańlaw yamasa eń jaqsı usınıslardı tańlaw) arqalı ámelge asırıladı.
Tiykarǵı kriteriyalar: Usınıs etilip atırǵan bahanıń qolaylılıǵı hám únemliligi. Xızmet kórsetiw tájiriybesi hám tarawǵa tiyisli unamlı jumıs abıroyı.o Finanslıq turaqlılıq hám salıqlar boyınsha qarızdarlıqtıń joqlıǵı.
Qatnasıwshılarǵa qoyılatuǵın tiykarǵı mamanlıq talapları: Tiyisli xizmet túri boyinsha licenziya yaki ruxsatnamalarga iye boliw (máselen, awqatlanıw ushin uliwma awqatlanıw obyektlerine qoyılatuǵın sanitariya talaplarına muwapıqlıq juwmaǵı).
Zárúr materiallıq-texnikalıq baza, zamanagóy úskeneler, arnawlı transport quralları hám maman kadrlar shtatınıń bar ekenligi. Salıqlar hám jıyımlar boyınsha múddeti ótken qarızdarlıqtıń joqlıǵı, sonday-aq, saplastırıw yamasa bankrotlıq procesinde emesligi.Házirgi waqıtta respublika (yamasa wálayat/rayon) kóleminde neshe mámleketlik medicina mákemesi autsorsing xızmetlerine ótkerilgen hám olar qaysı tarawlardı (máselen, katering, jumsaq inventar juwıw hám basqalar) qamtıp alǵan? Ózbekstan Respublikası Densawlıqtı saqlaw ministrligi hám aymaqlıq densawlıqtı saqlaw basqarmalarınıń rásmiy jıllıq esabatlarına bola, respublika boylap kóplegen kóp tarmaqlı oraylıq poliklinikalar, qánigelestirilgen ilimiy-ámeliy medicina orayları hám wálayat emlewxanalarında autsorsing xızmetleri basqıshpa-basqısh engizilgen.
Qamtılıp atırǵan tiykarǵı tarawlar: Katering (awqatlanıwdı shólkemlestiriw): Nawqaslar ushın shıpaker usınısı boyınsha dietalıq taǵamlardı tayarlaw, tarqatıw hám kir juwıw xızmetleri boyınsha, házirgi kúnde 32 medicina shólkemine, autsorsing kompaniyaları menen dúzilgen shártnamalar tiykarında xızmet kórsetilip kelinbekte. Autsorsing kompaniyaları menen dúzilgen shártnamalarda medicina mákemesiniń sanitariya-gigiena qaǵıydaları, qáwipsizlik hám sapa standartlarına ámel etiwi boyınsha qanday qatań minnetlemeler belgilengen?Autsorsing kompaniyaları menen dúziletuǵın shártnamalarda tómendegi qatań minnetlemeler belgilenedi:Ózbekstan Respublikasınıń ámeldegi Sanitariyalıq qaǵıydaları, normaları hám gigienalıq normativlerine jáne epidemiologiyalıq qáwipsizlik talaplarına qatań ámel etiw. Qollanılatuǵın ónimler, juwıw quralları hám azıq-awqat shiyki zatınıń sapası tiyisli sertifikatlarǵa ie bolıwı shárt.Qáwipsizlik standartların buzǵanı, óz waqtında xızmet kórsetpegenligi yamasa sanitariyalıq qaǵıydalarǵa qayshı háreket etkeni ushın shártnamada finanslıq juwapkershilik ilajları kórsetiledi.Xızmet kórsetiwshi jeke menshik kárxana xızmetkerleriniń mamanlıǵı, medicinalıq kórikten ótkenligi hám olardıń miynet huqıqları támiyinleniwi boyınsha juwapkershilik kimge júklenedi?
Xızmetkerlerdiń mamanlıǵı hám medicinalıq tekseriw: Xızmet kórsetiwshi jeke menshik kárxana óz xızmetkerleriniń tiyisli qánigeligi boyınsha maǵlıwmatqa ie bolıwın támiyinlew hám olardı belgilengen múddetlerde májbúriy medicinalıq tekseriwden ótkeriwdi (sanitariya dáptershesine ie bolıwın) tikkeley óz moynına aladı.Miynet huqıqları: Xızmetkerlerdiń miynet huqıqları (Miynet kodeksine muwapıq rásmiy jumısqa jaylasıw, miynet haqı, sociallıq támiynat) ushın tikkeley jeke menshik kárxana (autsorsing jumıs beriwshi sıpatında) juwapker esaplanadı.Autsorsing xızmetleriniń sapasın qadaǵalaw hám olardıń orınlanıwın monitoring etiw ushın medicina mákemelerinde qanday ishki komissiyalar yaki mexanizmler shólkemlestirilgen?
Medicina mákemelerinde autsorsing xızmetleri sapasın qadaǵalaw ushın tómendegi mexanizmler isleydi: Mákeme baslıǵınıń buyırıǵı menen dúziletuǵın Ishki vedomstvollıq komissiya (bul komissiya quramına bas shıpaker ornıbasarı, bas miyirbiyke, awqatlanıw boyınsha náwbechi dietolog shıpaker hám kásiplik awqam wákilleri kiredi).
Kúnlik monitoring: awqatlardıń kaloriyası, sapası hám sırtqı kórinisin tekseriw ushın óz aldına komissiya jumıs alıp baradı.Tazalaw hám sanitariyalıq jaǵdayı boyınsha bolsa mákemeniń bas epidemiologi hám xojalıq bólimi tárepinen turaqlı qadaǵalaw reydleri ótkeriledi.Xızmet kórsetiwshi subektler tárepinen shártnama shártleri buzılǵan yamasa sapa talaplarına ámel etilmegen jaǵdaylarda (máselen, awqatlanıw sapasınıń tómenligi yamasa tazalaw jumıslarınıń óz waqtında orınlanbaǵanlıǵı boyınsha shaǵımlar kelip túskende) qanday jaza ilajları yamasa sankciyalar qollanıladı? Sońǵı bir jılda shártnaması biykar etilgen autsorserler bar ma?
Qollanılatuǵın sankciyalar: Shártnama shártleri buzılǵanda (máselen, awqatlandırıw sapasınıń tómenligi, belgilengen waqıtta jetkerilmegeni yamasa tazalaw jumısları óz waqtında orınlanbaǵanı boyınsha tiykarlı shaǵımlar kelip túskende) dáslep, buyırtpashıǵa múddeti ótkerip jiberilgen hár bir kún ushın minnetlemeniń orınlanbaǵan bóleginiń 0,5 procenti muǵdarında penya tóleydi, bunda penyanıń ulıwma summası kórsetilmegen xızmetler aylıq bahasınıń 50 procentinen artpawı kerek.
Shártnamanı biykarlaw: Kemshilikler belgilengen múddette saplastırılmasa yamasa sanitariyalıq qaǵıydalar sezilerli buzılsa, medicina mákemesi shártnamanı bir tárepleme biykarlawǵa hám bunday kárxanalardı mámleketlik satıp alıwlardıń isenimsiz qatnasıwshıları reestrine (qara dizimge) kirgiziw ilajların kóredi. Keyingi jılları sapasız xızmet kórsetkeni sebepli ayırım aymaqlarda shártnamaları múddetinen aldın biykar etilgen, autsorser kompaniyalar ushıraspadı.Autsorsing xizmetleri ushin mámleket byudjetinen ajıratılatuģın qarjılardıń jumsalıwı hám olardıń nátiyjeliligi qalay bahalanadı? Autsorsing qanday finanslıq abzallıqlardı bermekte?
Bahalaw mexanizmi: Byudjet qarjılarınıń maqsetli hám nátiyjeli jumsalıwı Mámleketlik finanslıq qadaǵalaw inspekciyası hám Ǵaznachilik xızmeti tárepinen, xızmetlerdiń nátiyjeliligi bolsa Densawlıqtı saqlaw ministrligi tárepinen kórsetilgen xızmetlerdiń sapası hám nawqaslar arasında ótkeriletuǵın sociallıq sorawnamalar tiykarında bahalanadı.
Finanslıq abzallıqları:Mámleketlik mákemeni artıqsha shtat birlikleri (aspazlar, juwıwshılar, texnikalıq xızmetkerler) hám olarǵa baylanıslı turaqlı qárejetlerden (kesellik dem alısı, napaqa hám basqalar) azat etedi. Xojalıq tovarların satıp alıw, azıq-awqat ónimlerin saqlaw hám tayarlaw menen baylanıslı artıqsha qárejetlerdi qısqartıp, qarjılardı maqsetli bólistiriw imkaniyatın beredi.Xızmet kórsetiw sapası boyınsha báseki ortalıǵın jaratadı.
Alimbetov Bayrambek Nagmetovich Qaraqalpaqstan Respublikası Densawlıqtı saqlaw ministriniń finans-ekonomika hám investiciya boyınsha orınbasarı